- ३० चैत्र २०८२, सोमबार / Apr 13, 2026
हेटौंडा, २८ फागुन । मकवानपुरको मनहरी गाउँपालिका–१ मकरी क्षेत्रमा प्रहरीमाथि आक्रमण भएको छ । आत्मरक्षाका लागि प्रहरीले गोली चलाउँदा एक युवक घाइते भएका छन् ।
जिल्ला प्रहरी कार्यालय मकवानपुरका अनुसार लागूऔषध सेवन गरी झगडा भइरहेको सूचनापछि प्रहरी टोली घटनास्थल पुगेको थियो । बुधवार बेलुका करिब ९ बजे पदमपोखरी प्रहरी चौकीबाट प्रहरी सहायक निरीक्षक दिलबहादुर तामाङको नेतृत्वमा टोली त्यहाँ खटिएको थियो ।
प्रहरीले घटनास्थलमा पुगेर सोधपुछ गर्ने क्रममा अचानक प्रहरीमाथि आक्रमण भएको बताइएको छ । आक्रमणकारीहरूले बियरको बोतल, खुकुरी र बन्चरो प्रयोग गरी प्रहार गर्दा प्रहरी सहायक निरीक्षक तामाङका दुवै हातमा चोट लागेको प्रहरीले जनाएको छ । स्थिति नियन्त्रण बाहिर जान थालेपछि तामाङले साथमा रहेको पेस्तोलबाट एक राउन्ड गोली चलाएका थिए । उक्त गोली लागेर हेटौंडा उपमहानगरपालिका–१२ हात्तिगौडा बस्ने अन्दाजी १९ वर्षीय सनिस तितुङ घाइते भएका छन् । उनको पेटको दाहिने भागमा गोली लागेको र उपचारका लागि सिएमसी चुरेहिल अस्पताल हेटौंडामा उपचार भइरहेको प्रहरीले जनाएको छ ।
यस घटनापछि थप प्रहरी टोली परिचालन गरिएको थियो । प्रहरी नायव उपरीक्षक पुष्कर बोगटीको कमाण्डमा पुगेको टोलीले घटनामा संलग्न दुई जनालाई नियन्त्रणमा लिएको छ । पक्राउ पर्नेहरूमा हेटौंडा–१२ रमनटार बस्ने २४ वर्षीय सन्जय जिम्बा र सोही स्थानका ३५ वर्षीय अजय थिङ रहेका छन् ।
प्रहरीका अनुसार पक्राउ परेका दुवै व्यक्ति र घाइते तितुङ विगतमा लागूऔषध, ज्यान मार्ने उद्योग तथा चोरीजस्ता विभिन्न आपराधिक गतिविधिमा संलग्न रहेको प्रारम्भिक अनुसन्धानबाट खुलेको छ । घटनाबारे थप अनुसन्धान भइरहेको प्रहरीले जनाएको छ ।
