- ३० असार २०८३, मंगलवार / Jul 14, 2026
गुल्मी, १९ पुस । थप ३० नयाँ प्रजातिका चरा अभिलेखमा आएसँगै गुल्मी जिल्लामा हालसम्म पाइने चरा प्रजातिको संख्या ३५५ पुगेको छ । नेपाल पन्छी संरक्षण सङ्घले हालै गरेको चरा गणनाका क्रममा यी नयाँ प्रजातिहरू फेला परेका हुन् ।
नेपाल पन्छी संरक्षण सङ्घ गुल्मीका परियोजना अधिकृत शम्भु भट्टराईका अनुसार जिल्लाको रेसुङ्गा, मदाने र थाप्ले सत्यवती वन संरक्षण क्षेत्रमा गरिएको पछिल्लो चरा सर्वेक्षणमा नयाँ प्रजातिहरू पहिचान गरिएको हो । यस सर्वेक्षणमा रेसुङ्गा, मदाने र थाप्ले सत्यवती वन संरक्षण क्षेत्रबाट मात्र २५ नयाँ प्रजातिका चरा अभिलेख गरिएको उनले जानकारी दिए । यसअघि रेसुङ्गा र मदाने वन संरक्षण क्षेत्रमा वर्षमा दुई पटक चरा सर्वेक्षण हुँदै आएकोमा यसपटक पहिलो पटक थाप्ले सत्यवती वन संरक्षण क्षेत्र लाई पनि समेटेर अध्ययन गरिएको हो । नयाँ फेला परेका चरा प्रजातिहरूमा तिलहरी, मोटो ठुँडे पुष्पकोकिला, उमाचाँचर, तिबिल्चे, मुरालिडे ढिकुरे भ्याकुर, निलो लघुपङ्ख, हटचुर चाँचर, हलीमुख र सिम कुखुरालगायत रहेका छन् ।
गुल्मी जिल्लामा विश्वमै दुर्लभ मानिने छ प्रजातिका चरा पनि पाइने गरेका छन् । तीमध्ये रेसुङ्गा वन संरक्षण क्षेत्रमा चिरकालीज, रणमत्त महाचिल, डङ्गर गिद्द, सेतो गिद्द, सुन गिद्द र गोमायो महाचिल भेटिने नेपाल पन्छी संरक्षण सङ्घले जनाएको छ । काँडे भ्याकुर भने रेसुङ्गा, मदाने र थाप्ले सत्यवती तीनै वन क्षेत्रमा अभिलेख गरिएको छ । नेपालमा पाइने कुल ९०३ प्रजातिका चरा मध्ये करिब ४० प्रतिशत चरा गुल्मीमा फेला परेको सङ्घको तथ्याङ्कले देखाएको छ । विभिन्न चरणमा गरिएको सर्वेक्षणअनुसार रेसुङ्गा वन क्षेत्रमा २७६, मदाने वन संरक्षण क्षेत्रमा २८९ र थाप्ले सत्यवती वन संरक्षण क्षेत्रमा १९६ प्रजातिका चरा अभिलेख भएका छन् ।
तीनवटै वन संरक्षण क्षेत्र समेटेर गरिएको पछिल्लो सर्वेक्षणपछि जिल्लामा जम्मा ३५५ प्रजातिका चरा को तथ्याङ्क अभिलेख गरिएको हो । सङ्घले वन क्षेत्र आसपासका स्थानीय समुदायलाई वन संरक्षणसँगै जीविकोपार्जनमा सहयोग पुग्ने कार्यक्रमहरू सञ्चालन गर्दै आएको जनाएको छ । रेसुङ्गा नगरपालिकाका प्रमुख खिलध्वज पन्थीले गुल्मीमा चरा पर्यटन (बर्ड टुरिजम) को ठूलो सम्भावना रहेको बताएका छन् ।
