- २७ श्रावण २०८३, बुधबार / Aug 12, 2026
दोलखा । भरुवा बन्दुक पड्किएर छर्रा लाग्दा एक पुरुषको मृत्यु भएको छ । तामाकोशी गाउँपालिका–२ झुलेका २० वर्षीय सञ्जिव सार्कीको मृत्यु भएको हो । आफैंले बोकेको भरुवा बन्दुक अटोमेटिक फायर हुँदा उनको देब्रे छातीमा छर्रा लागेको उनका साथीहरुले बताए ।
घाइते भएका सञ्जिवलाई तामाकोशी अस्पतालमा प्राथमिक उपचारपछि राति नै चरिकोटस्थित पशुपति चौंलागाई स्मृति अस्पताल ल्याइएको थियो । अस्पताल भर्ना लगत्तै उनलाई चिकित्सकले मृत घोषणा गरेको दोलखा प्रहरीले जनाएको छ ।
सञ्जिवसहित ७ जना स्थानीय गएराति डाँडाबारी जंगलमा शिकार खेल्न गएका थिए । सञ्जिवको मृत्यु भएको घटना सार्वजनिक भएपछि शिकार खेल्न गएका स्थानीय ६ जना युवालाई प्रहरीले नियन्त्रणमा लिएर अनुसन्धान थालको छ ।
तामाकोशी गाउँपालिका–३ का १६ वर्षीय कृष्ण नेपाली, सोही स्थानका १८ वर्षीय रचेस मुग्राती, १५ वर्षीय सुमन तोलांगी, २२ वर्षीय माधव पोख्रेल, ४२ वर्षीय सञ्जिव पोख्रेल र तामाकोशी गाउँपालिका–२ झुलेका २५ वर्षीय अविदित कार्कीलाई पक्राउ गरी अनुसन्धान थालेको प्रहरीले जनाएको छ ।
