- ३ आश्विन २०८३, शनिबार / Sep 19, 2026
काठमाडौं । नेपाल सरकारले थप ५७ हिमाल आरोहणका लागि खुलाउने प्रक्रिया अघि बढाएको छ । ताप्लेजुङदेखि हुम्लासम्मका विभिन्न ५७ हिमाल आरोहणका लागि खुला गर्ने विषयमा सरकारलाई सिफारिस गरेको पर्यटन विभागका निर्देशक राकेश गुरुङले जानकारी दिए । मन्त्रिपरिषदले स्वीकृति दिएपछि नयाँ हिमाल आरोहणको बाटो खुल्ने उनको भनाइ छ ।
आर्थिक वर्ष २०८०/०८१ को वार्षिक नीति तथा कार्यक्रममा समावेश अनुसार नेपाल भारत तथा नेपाल चीनसँग सिमाना जोडिएकासहित ५७ वटा हिमाल आरोहणका लागि खुला गर्न लागिएको हो । ५७ हिमालमध्ये ४६ वटा हिमाल चीनसँग, दुई हिमाल भारतसँग सिमाना जोडिएका र नौ वटा हिमाल सीमाभित्रका रहेका छन् ।
आरोहणका लागि खुला गर्न लागिएका हिमालहरू पाँच हजार ८०७ देखि छ हजार ८६८ मिटर उचाइसम्मका छन्। हाल सरकारले आरोहणका लागि ४०१ वटा हिमाल आरोहणका लागि खुला गरेको छ । तर पनि सबैमा आरोहण हुन सकेको छैन । हाल पर्यटन विभाग र पर्वतारोहण संघले हिमाल आरोहण अनुमति दिँदै आएका छन् ।
