- ३१ श्रावण २०८३, आईतवार / Aug 16, 2026
जाजरकोट, ३१ साउन । जाजरकोटको भेरी नगरपालिका–२ फारुल्लामा पहिरोमा परी बेपत्ता भएका आमा रती खत्री र उनका छोरा ओमसिंह खत्री मृत फेला परेका छन् ।
शनिबार खसेको पहिरोमा परी बेपत्ता भएका उनीहरूको शव आइतबार बिहान उद्धारमा खटिएको सुरक्षाकर्मीको टोलीले पहिरोमा पुरिएको अवस्थामा फेला पारेको हो ।
पहिरोमा परी आमा रती खत्री र उनका छोरा ओमसिंह खत्री बेपत्ता भएका थिए । सुरक्षाकर्मीको टोलीले खोजी गर्ने क्रममा उनीहरूको शव फेला पारेको हो । शनिबार साँझ भेरी नगरपालिका–२ कै चिसापानीमा समेत पहिरो खसेको थियो । उक्त पहिरोमा परी ७० वर्षीय भीमबहादुर कार्की बेपत्ता भएका छन् । उनको खोजी कार्य जारी रहेको प्रहरीले जनाएको छ ।
सोही पहिरोमा परेका ५२ वर्षीया केदार कार्कीलाई उद्धार गरी उपचारका लागि नेपालगञ्ज लैजाने क्रममा बाटोमै मृत्यु भएको थियो ।
पहिरोमा परी ६ जना घाइते भएका छन् । उनीहरूको सुर्खेत तथा जाजरकोट अस्पतालमा उपचार भइरहेको छ । जाजरकोटका डीएसपी बुद्धीसागर पुरीका अनुसार घटनास्थलमा सुरक्षाकर्मीको टोली परिचालन गरी खोजी तथा उद्धारको काम भइरहेको छ ।
पहिरोका कारण विभिन्न स्थानमा सडक अवरुद्ध हुँदा घटनास्थलसम्म पुग्न तथा उद्धार कार्य सञ्चालन गर्न समस्या भइरहेको डीएसपी पुरीले जानकारी दिए ।
