तीन प्रदेशमा हल्का वर्षा र हिमपातको सम्भावना, तराइमा मौसम सफा रहने

काठमाण्डौ, ३ बैशाख । मौसम पूर्वानुमान महाशाखाले आज कोशी प्रदेश, बागमती प्रदेश र गण्डकी प्रदेश का एक/दुई स्थानमा मेघगर्जन र चट्याङ्गसहित हल्का वर्षा तथा हिमपातको सम्भावना रहेको जनाएको छ।

महाशाखाका अनुसार कोशी प्रदेशको पहाडी तथा हिमाली भू–भागका थोरै स्थानमा तथा बागमती र गण्डकी प्रदेशको हिमाली भू–भागका एक/दुई स्थानमा मेघगर्जन र चट्याङ्गसहित हल्का वर्षा र हिमपात हुने सम्भावना रहेको छ।

आज दिउँसो कोशी प्रदेशको पहाडी भू–भाग तथा बागमती र गण्डकी प्रदेशको हिमाली भू–भागमा आंशिकदेखि सामान्य बदली रहने अनुमान गरिएको छ। बाँकी प्रदेशका पहाडी तथा हिमाली भू–भागमा आंशिक बदली रहने भए पनि तराईका अधिकांश क्षेत्रमा मौसम सामान्यतया सफा रहने विभागले जनाएको छ।

यस्तै, आज रातिको समयमा पनि कोशी र गण्डकी प्रदेशका हिमाली भू–भागका एक/दुई स्थानमा हल्का वर्षा तथा हिमपातको सम्भावना रहेको मौसम पूर्वानुमान महाशाखाले जानकारी दिएको छ।