- २३ बैशाख २०८३, बुधबार / May 6, 2026
दाङ, १५ बैशाख । संकटापन्न अवस्थामा पुगेको लाटोकोसेरोको संरक्षण र जनचेतना फैलाउने उद्देश्यले दाङको लमहीमा लाटोकोसेरो तथा हुचिल उत्सव आयोजना गरिने भएको छ।
लमही नगरपालिका–५ स्थित जैविक विविधता पार्कमा आगामी वैशाख १८ र १९ गते पहिलो पटक यो उत्सव आयोजना हुन लागेको हो।अजम्मरी सामुदायिक वन उपभोक्ता समूह लमही र काठमाडौंस्थित ‘प्रकृतिका साथीहरू’ संस्थाको संयुक्त आयोजनामा हुन लागेको यो उत्सवले लाटोकोसेरो संरक्षणमा समुदायलाई सक्रिय बनाउने लक्ष्य लिएको छ।
‘प्रकृतिका साथीहरू’ संस्थाका निर्देशक राजु आचार्यका अनुसार लाटोकोसेरो किसानको साथीका रूपमा चिनिने महत्वपूर्ण चरा भए पनि अवैध व्यापार र चोरीसिकारीका कारण यसको अस्तित्व संकटमा परेको छ। उनका अनुसार उत्सवले लाटोकोसेरोसँगै समग्र चरा तथा वन्यजन्तु संरक्षण, जैविक विविधताको महत्व र वातावरणप्रति जिम्मेवारीबारे जनचेतना फैलाउनेछ।
यसअघि पनि संस्थाले धादिङ, चितवन, नवलपरासी, गोर्खा, कास्की, कपिलवस्तु, दोलखा र खोटाङलगायत जिल्लामा यस्ता उत्सव सञ्चालन गरिसकेको छ।
दुई दिनसम्म चल्ने उत्सवको पहिलो दिन चरा अवलोकन, लाटोकोसेरोसम्बन्धी लघु म्युजियम, रोबोट प्रदर्शनी तथा श्रव्य–दृश्य सामग्री प्रस्तुत गरिनेछ। दोस्रो दिन संरक्षण, संस्कृति र लाटोकोसेरोसम्बन्धी विविध प्रदर्शनी तथा कार्यक्रमहरू आयोजना गरिने आयोजकले जनाएको छ।
