अनेक प्रकरण ढाकछोप गर्न रवि लामिछानेले गृहमन्त्री पद खोजेको महेश बस्नेतको आरोप

काठमाडौं । नेकपा एमालेका पोलिटब्युरो सदस्य महेश बस्नेतले राष्ट्रिय स्वतन्त्र पार्टीका अध्यक्ष एवं पूर्व गृहमन्त्री रवि लामिछानेमाथि अनेक प्रकरण ढाकछोप गरेर जोगिनका लागि गृहमन्त्री पद चाहिएको आरोप लगाएका छन् । बिहीवार राष्ट्रिय युवा संघ नेपालले संगठनको नयाँ इन्चार्जलाई स्वागत तथा पुरानो इन्चार्जलाई बिदाई गर्न आयोजना गरेको कार्यक्रममा उनले आईजीपी अमेरिका गएका वेला प्रहरीमा विद्रोह गर्न लगाउने योजनासमेत रास्वपा अध्यक्ष लामिछानेले बनाएको आरोप लगाएका छन्।

बस्नेतले साना दलहरुको नाममा भइरहेको च्याँखे प्रवृत्ति रोक्न संविधान संशोधन गर्न लागिएको बताए। उनले साना दलहरुको नाममा भइरहेको च्याँखे प्रवृत्ति र अराजक प्रवृत्तिहरुलाई नियन्त्रण गर्न संविधान संशोधन गरिने बताए । उनले देशमा राजनीतिक स्थिरता दिन कांग्रेस–एमाले सत्ता सहकार्य भएको बताए। एमाले र कांग्रेस चुनावअगाडि अन्य दलहरुसँग सहकार्य नगर्ने कुरामा प्रतिबद्ध भएको पनि उनको भनाइ छ।

उनले निर्वाचनसँग सम्बन्धित कानूनहरु संशोधन गरेर जाने बताए। उनले भ्रष्टाचार अन्त्य गर्दै सुशासन कायम गर्न सरकार प्रतिबद्ध रहेको पनि बताए।