मेघगर्जन र चट्याङसहित वर्षाको सम्भावना, सतर्कता अपनाउन अनुरोध

काठमाडौं । देशभर पश्चिमी वायुको प्रभाव कायमै छ । प्रभावका कारण लुम्बिनी र मधेश प्रदेशलगायत देशको पहाडी भागमा साधारणतया बदली हुने छ ।

मधेश, गण्डकी र लुम्बिनी प्रदेशका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको जल तथा मौसम विज्ञान विभागले जनाएको छ । देशका उच्च पहाडी तथा हिमाली भागका एक–दुई स्थानमा हिमपातको सम्भावना छ ।

राति देशका पहाडी भागमा आंशिकदेखि साधारणतया बदली रही बाँकी भागमा आंशिक बदलीदेखि मौसम मुख्यतया सफा रहनेछ । हल्का हिमपातको सम्भावना भएका स्थानमा आवश्यक सतर्कता अपनाउन विभागले अनुरोध गरेको छ ।