- ८ असार २०८३, सोमबार / Jun 22, 2026
काठमाडौं । भारतमा तेस्रो पटक नरेन्द्र मोदी प्रधानमन्त्री हुने तयारीमा छन्। भारतीय जनता पार्टी (भाजपा) नेतृत्वको एनडिए गठबन्धनका दलहरूको सहयोगमा मोदी प्रधानमन्त्री बन्न लागेका हुन्। मोदीलाई प्रधानमन्त्री बनाउन नितिश कुमार प्रमुख रहेको जनता दल र चन्द्रबाबु नायडू प्रमुख रहेको तेलगु देसम पार्टीले बुधबार लिखित सहमति नै गरिसकेका छन्।
उनीहरू चुनाव अघिदेखि नै एनडिए गठबन्धनमै थिए। प्रधानमन्त्रीमा दाबी गरेर मोदीले आइतबार नै शपथ लिन खोजेका छन्।
हिन्दुस्तान टाइम्सका अनुसार नेशनल डेमोक्रेटिक अलायन्सका नेता मोदीले आइतबार साँझ ६ बजे प्रधानमन्त्रीको शपथ लिने तयारी गरेका छन्।
सरकार गठनका लागि एनडिएका दलहरूबीच छलफल भइरहेको छ। भारतीय जनता पार्टीका नेताहरू अमित शाह र राजनाथ सिंह पार्टी अध्यक्ष जेपी नड्डाको घरमा छन्। भाजपाका सांसदहरू र मुख्यमन्त्रीहरूलाई छलफल गर्न नयाँ दिल्लीमा बोलाइएको छ। उनीहरूसँग शुक्रबार बिहान साढे १० बजे छलफल गर्ने तयारी छ।
