- १ आश्विन २०८३, बिहीबार / Sep 17, 2026
भरतपुर । दैनिक मुग्लिन–काठमाडौँ सडक तीन घण्टा बन्द हुने भएको छ। घुम्तीलगायत केही स्थानमा कटान गर्नुपर्ने भएकाले आइतबारदेखि यही पुस १३ गतेसम्म दैनिक बिहान ११ः०० देखि दिउँसो २ः०० बजेसम्म सडक बन्द गरिने भएको हो ।
स्तरोन्नतिसहित निर्माणाधीन उक्त सडक विस्तारका क्रममा बन्द गरेर निर्माण गरिने नागढुङ्गा–मुग्लिन सडक आयोजनाले जनाएको छ। पोखरेभिर मोड सुधारका लागि नौबिसेबाट गजुरी तर्फ जाने भारी सवारीसाधन गल्छी–बैरेनी र हलुका सवारीसाधन जरेखेतमा रोकिने छ।
चितवनतर्फबाट नौबिसे जाने सवारीसाधन चालिसे र घाटबेँसीमा रोकिनेछ। विशालटार मोड सुधारका लागि मुग्लिनबाट मलेखु जाने सवारीसाधन मझिमटार र चरौंदी बजारमा रोकिने जनाएको छ।
आयोजनाले सूचना जारी गर्दै सो राजमार्ग भएर काठमाडौँ जाने आउने सवारीचालकले लेन अनुशासन पालना गरी सवारी चलाउन आग्रह गरेको छ। सो समयमा एम्बुलेन्स, प्रहरीका सवारी र दमकलजस्ता अत्यावश्यक सवारीसाधन चल्न रोकावट नहुने जनाइएको छ।
