- ८ भाद्र २०८३, सोमबार / Aug 24, 2026
भक्तपुर । दश वर्षदेखि निर्माण कार्य अलपत्र भक्तपुर भत्केपाटी–नगरकोट सडक खण्डको बाँकि काम छिटो सम्पन्न गर्न सरोकारवालाबीच छलफल भएको छ । पटक पटक ताकेता गर्दा पनि काम सम्पन्न नभएपछि बिहीबार पुनः चाँगुनारायण नगरपालिकामा सरोकारवालाबीच छलफल भएको हो ।
नगर प्रमुख जीवन खत्री, उपप्रमुख रमेश बुढाथोकीलगायत वडाध्यक्षहरु, प्रमुख जिल्ला अधिकारी रोशनी कुमारी श्रेष्ठ, डिभिजन सडक कार्यालय भक्तपुरका प्रमुख मेघराज मरासिनी, नगरपालिकाका प्रमुख प्रशासकीय अधिकृत चुरामणी पन्थी र सुरक्षा निकायका प्रमुखहरुबीच भएको छलफलमा निर्माण ब्यवसायीले आइतबारबाट काम शूरु गर्ने प्रतिबद्धता जनाए ।
नगरकोट सडकको बाँकि काम सम्पन्न गर्न फेरी पनि मेयर खत्रीले ताकेता गरे । माथिल्लो निकायले दबाब दिएपनि निर्माण ब्यवसायीले नटेरेको सहभागिले बताए । अब पनि काम सम्पन्न नगरे जनताले कसैलाई नछोड्ने जिकिर गरे । नगरकोट सडकको काम गर्न आफै सक्षम भएपनि कानूनी अल्झनका कारण सम्भव नभएको र अधुरो हुने अवस्था भएकाले अब अन्तिम टाइमलाईनबाट पछि नहट्न निमार्ण ब्यवसायीलाई निर्देशन दिए ।
छलफलमा प्रमुख जिल्ला अधिकारी रोशनी कुमारी श्रेष्ठले सडक अलपत्र छोडिदा दुर्घटनाको जोखिम बढेको भन्दै सडकको कामको विषयमा स्थानीयको दबाब थेग्न नसक्ने गरि आइरहेको बताइन् । डिभिजन सडक कार्यालय भक्तपुरका प्रमुख मरासिनीले निर्माण ब्यवसायीले ९५ प्रतिशत काम सम्पन्न गरेको अवस्थामा ठेक्का तोड्न ब्यवहारिक हिसावबाट पनि नमिल्ने बताए ।
निर्माण ब्यवसायीले भने यसअघिको कामको भुक्तानी नपाउँदा काम सम्पन्न गर्न नसकेको तर बाहिर गलत प्रचार भएको जिकिर गरे । १५ किलोमिटर ६६० मिटर लामो भक्तपुर–नगरकोट सडक खण्ड निर्माण गर्न शैलुङ कन्स्ट्रक्सन–एआइपिएल (आरामाली इन्फ्रा पावर लिमिटेड) जेभीले २०७१ जेठ २२ मा सम्झौता गरी २०७३ कात्तिक ४ गते निर्माण सम्पन्न गर्ने गरी ठेक्का सम्झौता भएको थियो । तर कयौ पटक म्याद थपिसक्दा पनि अहिलेसम्म सम्पन्न हुन नसक्दा स्थानीयवासीले सास्ती खेप्दै आएका छन् ।
