- २ असार २०८३, मंगलवार / Jun 16, 2026
बाँके । नरैनापुरमा झाडा पखालाका कारण एकै दिन ४ जनाको मृत्यु भएको छ । नरैनापुर ३ गेगली गाउँमा एक्कासि फैलिएको झाडा पखालाबाट १० जना बिरामी परेका छन् । ती मध्य चारजनाको मृत्यु भएको नरैनापुर ३ का वडा अध्यक्ष अजय मिश्राले बताए ।
हरिराम पासीको श्रीमती वर्ष २५ कि रुसा पासी र उनकी छोरी वर्ष डेढ कि नन्दनी पासी, मोहन लाल पासीको श्रीमती वर्ष ६० कि शान्ति पासी र सखावत अलिको छोरा वर्ष १० को यूसुफको मृत्यु भएको हो ।
भारतीय सिमासंग जोडिएको गाउँ गेगलीमा झाडापखाला फैलिएको जानकारी पाउनसाथ स्वास्थ्य चौकीका सिनियर अहेब तैयब अहमद र अन्य स्वास्थ्यकर्मीको टोलीले गाउँमै पुगेर विरामीको उपचार गरिरहेको गाउँपालिकाका स्वास्थ्य शाखा प्रमुख नगेन्द्र कुमार शाहले बताए ।
झाडा पखाला फैलिएको गेगलीमा स्वास्थ्य क्याम्प स्थापना गरी उपचार सुरु गर्न स्वास्थ्यकर्मीहरुलाई निर्देशन दिएको गाँउपालिकाका अध्यक्ष इश्तियाक अहमद शाहले बताए । अत्यधिक गर्मी र खानेपानीमा गडबडी भएका कारण गाउँमा झाडा पखाला फैलिएको हुनसक्ने स्वाथ्यकर्मीको भनाइ छ ।
