- १८ श्रावण २०८३, सोमबार / Aug 3, 2026
काठमाडौँ, २८ चैत्र । नेपाली कम्युनिस्ट पार्टी (नेकपा) को केन्द्रीय कार्यसंयोजक समितिको बैठकले कलेजहरूमा विद्यार्थी संगठन तथा कार्यस्थलमा ट्रेड युनियनमाथि प्रतिबन्ध लगाउने निर्णयको विरोध गरेको छ।
बैठकबारे जानकारी दिँदै पार्टी नेता जगन्नाथ खतिवडा ले यस्तो कदमले नागरिक तथा श्रमिकहरूको अधिकार कुण्ठित गर्ने भएकाले पार्टी यस निर्णयको विपक्षमा उभिने निर्णयमा पुगेको बताएका हुन्।
पार्टीको ४५ सदस्यीय केन्द्रीय कार्यसंयोजन समितिमा अहिलेसम्म ४३ जना नेताहरूले आ–आफ्नो धारणा राखिसकेका छन्। विगत सात दिनदेखि दैनिक केही घण्टा बसेर लम्बिएको बैठकमा देशको समसामयिक राजनीतिक अवस्था, नयाँ सरकारको कार्यशैली तथा एकीकृत पार्टीको कमिटी समायोजनका विषयमा विस्तृत छलफल भइरहेको छ।
नेता खतिवडाका अनुसार हालसम्मका छलफलहरू विचार विमर्शकै चरणमा रहेकाले औपचारिक प्रस्तावका रूपमा कुनै पनि निर्णय पारित भइसकेको छैन। नयाँ वर्षको व्यस्तता तथा आन्तरिक तयारीका लागि केही दिन समय आवश्यक भएकाले अबको बैठक वैशाख ३ गते बस्ने तय गरिएको छ।
बैठकले पार्टीको आगामी कार्ययोजना तथा साङ्गठनिक समायोजनसम्बन्धी ठोस खाकालाई अन्तिम रूप दिने तयारी गरिएको बताइएको छ। साथै वैशाख ३ वा ४ गतेभित्र बैठक औपचारिक रूपमा समाप्त हुने र त्यसपछि पार्टीका आगामी रणनीतिहरू सार्वजनिक गरिने जानकारी दिइएको छ।
