- २६ भाद्र २०८३, शुक्रबार / Sep 11, 2026
काठमाण्डौ । रुसी सेनामा पाँच सय ३१ जना नेपाली रहेको तथ्याङ्क सार्वजनिक भएको छ । रुसी सेनामा रहेका नेपाली युवाका आफन्तले सञ्चालन गरेको पीडित परिवार तथा नागरिकको जीवन रक्षाको लागि सचेतना अभियानले काठमाण्डौमा पत्रकार सम्मेलन गरी तथ्याङ्क सार्वजनिक गरेको हो ।
सम्पर्कमा आएका पाँच सय ३१ जनामध्ये एक सय २७ जनाका परिवारले घर फर्काउन पहलका लागि विवरण टिपाएका छन् । उनीहरू अहिले पनि रुसी सेनामा कार्यरत छन् । रुसमा १६ जनाको ज्यान गएको छ । उनीहरुको काजक्रिया पनि भइसकेको छ । एक सय १६ जना घाइते र दुई सय ७२ जना सम्पर्कविहीन रहेका छन् ।
रुसी सेनामा रहेका एक हजारभन्दा बढी युवाका परिवार अनौपचारिक रुपमा आफ्नो सम्पर्कमा आएको जनाइएको छ । सम्पर्कमा आएका पीडित परिवारका आधारमा तथ्याङ्क तयार पारिएको र रुसी सेनामा रहेका नेपाली युवाको उद्धारका लागि सरकारलाई दबाब दिन विवरण सङ्कलन थालिएको छ ।
अभियानले रुसी सेनामा रहेकोहरुको सकुशल घर फिर्ताका लागि व्यवस्था गर्नुपर्नेलगायत विषय उल्लेख गर्दै काठमाण्डौमा रहेको रुसी दूतावास, संयुक्त राष्ट्रसङ्घको कार्यालय, विभिन्न राजनीतिक दलका कार्यलयमा ध्यानाकर्षण गराइसकेको छ । रुसी सेनामा ज्यान गुमाएका युवाको आत्माको शान्तिका लागि दीप प्रज्वलन गरिएको परिवारजनले बताएका छन् ।
