- ३० चैत्र २०८२, सोमबार / Apr 13, 2026
काठमाडौँ, ११ फागुन । निर्वाचन आयोगले निर्वाचन आचारसंहिता उल्लङ्घनसम्बन्धी ८५ उजुरीमा सम्बन्धित राजनीतिक दल तथा उम्मेदवारसँग स्पष्टीकरण मागेको जनाएको छ । केन्द्रीय आचारसंहिता अनुगमन समितिमा प्राप्त उजुरीमध्ये हालसम्म ५४ वटाको जवाफ प्राप्त भएको आयोगले जानकारी दिएको छ ।
आयोगका कानून अधिकृत मोहनराज जोशीका अनुसार ७९ जनासँग स्पष्टीकरण र ६ जनासँग पुनः स्पष्टीकरण मागिएको छ । आचारसंहिता उल्लङ्घन गरेको आरोपमा राजनीतिक दल, उम्मेदवार, सरकारी तथा गैरसरकारी संस्था, सञ्चारमाध्यम र पत्रकारसँग पनि स्पष्टीकरण सोधिएको छ ।
दर्ता भएका सञ्चारमाध्यम र त्यहाँ आबद्ध पत्रकारका हकमा भने प्रेस काउन्सिल नेपालमार्फत स्पष्टीकरण तथा आवश्यक कारबाहीका लागि पत्राचार गरिएको आयोगले जनाएको छ । निर्वाचन विश्लेषणका नाममा मत सर्वेक्षण प्रकाशन गरेको भन्दै सेतोपाटी अनलाइनलाई समेत प्रेस काउन्सिलमार्फत स्पष्टीकरण सोधिएको छ ।
जिल्लास्तरमा पनि आचारसंहिता उल्लङ्घनसम्बन्धी उजुरीहरू प्राप्त भई आवश्यक कारबाही प्रक्रिया अघि बढाइएको आयोगले जनाएको छ । प्राप्त ५४ वटा जवाफको अध्ययन भइरहेको छ ।
आचारसंहिताको प्रभावकारी कार्यान्वयनका लागि केन्द्रीय तथा जिल्ला आचारसंहिता अनुगमन समिति, जिल्ला आचारसंहिता अनुगमन अधिकृत र सम्बन्धित निर्वाचन कार्यालयहरू सक्रिय रहेको आयोगको भनाइ छ ।
निर्वाचन आचारसंहिता, २०८२को दफा ३२ बमोजिम ७७ वटै जिल्लाका सहायक प्रमुख जिल्ला अधिकारीलाई आर्थिक बाहेकका विषयमा तथा प्रमुख कोष नियन्त्रक र कोष नियन्त्रकलाई आर्थिक विषयमा अनुगमन अधिकृत तोकिएको छ । आयोगले सबै जिल्लामा सरोकारवालालाई आचारसंहिताबारे जानकारी गराउने र पालना गर्ने प्रतिबद्धता गराउने कार्य प्रभावकारी रूपमा भइरहेको जनाएको छ ।
