- २६ असार २०८३, शुक्रबार / Jul 10, 2026
पर्सा, ११ फागुन । जिल्ला प्रशासन कार्यालय पर्सामा बसेको सर्वदलीय तथा सर्वपक्षीय बैठकले जिल्लामा शान्ति, सद्भाव र संयमता अपनाउने निर्णय गरेको छ ।
वीरगञ्ज महानगरपालिका–११ श्रीपुरमा गएराति र आज बिहान भएको घटनापछि उत्पन्न हुन सक्ने सामाजिक तथा साम्प्रदायिक तनावलाई मध्यनजर गर्दै यस्तो निर्णय गरिएको हो ।
प्रमुख जिल्ला अधिकारी भोला दाहालको अध्यक्षतामा बसेको बैठकले घटनाबाट प्रभावित पक्षलाई उपचार तथा राहत उपलब्ध गराउन प्रशासनसँग समन्वय गर्ने, पीडित परिवारलाई कानुनी प्रक्रियामार्फत न्याय दिलाउन सहयोग गर्ने तथा सामाजिक सञ्जालमा उत्तेजक प्रचार–प्रसार नगर्न सबै पक्षलाई आग्रह गर्ने निर्णय गरेको छ ।
बैठकले व्यक्तिगत घटना वा दुर्घटनालाई लिएर सामाजिक सञ्जालमा भ्रामक सूचना फैलाउने तथा साइबर कानुनविपरीत गतिविधिमा संलग्न व्यक्तिमाथि कानुनी कारबाही अघि बढाउने चेतावनी पनि दिएको छ । गाडी पार्किङको विषयमा सुरु भएको विवाद दुई पक्षबीच झडपमा परिणत भएपछि प्रशासनले कर्फ्यू आदेश जारी गरी सेना परिचालन गरेको जनाएको छ ।
यसअघि गौरमा पनि विवाह समारोहको विषयलाई लिएर विवाद उत्पन्न हुँदा स्थानीय प्रशासनले कर्फ्यू आदेश जारी गरेको थियो । यद्यपि रौतहट र वीरगञ्जका घटनाबीच कुनै सम्बन्ध नरहेको प्रहरीले स्पष्ट पारेको छ । नेपाल प्रहरीको केन्द्रीय कार्यालयले मधेशका विभिन्न स्थानमा उत्पन्न परिस्थितिलाई ध्यानमा राख्दै उच्च सावधानीसहित सुरक्षा योजना कार्यान्वयनमा ल्याइएको जनाएको छ ।
