- २ बैशाख २०८३, बुधबार / Apr 15, 2026
कास्की, १ बैशाख । नयाँ वर्ष २०८३ को अवसर पारेर पोखरा अन्तर्राष्ट्रिय विमानस्थलबाट निःशुल्क सटल बस सेवा सुरु गरिएको छ ।पोखरा महानगरपालिकाको पहलमा विमानस्थलबाट अम्मरसिंह चोकसम्म निःशुल्क सटल बस सेवा सञ्चालनमा ल्याइएको हो । यो सेवा हिजोदेखि औपचारिक रूपमा सुरु गरिएको हो ।
सेवाको शुभारम्भ पोखरा महानगरपालिकाका मेयर धनराज आचार्य ले गर्नुभएको हो । महानगरपालिकाका अनुसार महानगर यातायात प्रालि, कृषि विकास बैंक र कामना सेवा विकास बैंकको सहकार्यमा यो सेवा सञ्चालन गरिएको छ ।
यो सेवा पाइलट परियोजनाका रूपमा असार मसान्तसम्म निःशुल्क रहनेछ । त्यसपछि यात्रुबाट न्यूनतम शुल्क लिएर नियमित रूपमा सञ्चालन गर्ने योजना रहेको महानगरले जनाएको छ ।
मेयर आचार्यका अनुसार विमानस्थलबाट शहरसम्म यात्रा गर्दा ट्याक्सी भाडा महँगो भएको गुनासो बढेपछि यात्रु र पर्यटकलाई सहज बनाउन सटल बस सेवा सुरु गरिएको हो ।
पहिलो चरणमा दुई वटा बस सञ्चालनमा ल्याइएको छ । बसले बिहान ६ बजेदेखि राति १० बजेसम्म निरन्तर सेवा दिने व्यवस्था मिलाइएको छ । विमानस्थल हुँदै दैनिक करिब ५ हजार यात्रु ओहोरदोहोर गर्ने भएकाले यो सेवाले यात्रुहरूलाई ठूलो राहत पुग्ने अपेक्षा गरिएको छ ।
