नेपाल चिकित्सक सङ्घको आह्वानमा आन्दोलन सुरु

काठमाण्डौ । चिकित्सकहरु आन्दोलित भएका छन् । देशभरका चिकित्सकहरुको छाता संगठन नेपाल चिकित्सक सङ्घको आह्वानमा आन्दोलन सुरु भएको हो ।
आफ्ना माग पूरा नभएको भन्दै कालोपट्टी बाँधेर आन्दोलन शुरू गरेका हुन ।

सङ्घले स्वास्थ्य सेवामा चिकित्सक तथा स्वास्थ्यकर्मीहरूको थप दरबन्दी अविलम्ब सिर्जना गरी यथाशीघ्र विज्ञापन गरिनुपर्ने, अस्पताल विकास समितिअन्तर्गत कार्यरत सम्पूर्ण चिकित्सकहरूलाई स्थायी नियुक्ति प्रदान गरिनुपर्ने, चिकित्सक तथा स्वास्थ्यकर्मीहरूको नियुक्ति तथा तलब भत्तामा एकरूपता कायम गरी जोखिम भत्तालगायत थप भत्ता उपलब्ध गराउनुपर्ने लगायतका माग राखेको छ ।

सरकारले माग सम्बोधन नगरेमा आकस्मिक सेवाबाहेकका सम्पूर्ण सेवा बन्द गरी थप आन्दोलनका कार्यक्रम तय गर्ने सङ्घको भनाइ छ । सरकारलाई दिएको ४८ घण्टाको समयभित्र माग पूरा नभएपछि उनीहरू आ–आफ्नो कार्यालयअगाडि कालोपट्टी बाँधेर एक घण्टा धर्ना बस्ने भएका हुन् । देशभरका स्वास्थ्य संस्थामा यो आन्दोलका कार्यक्रम हुने सङ्घले जनाएको छ ।