- ९ बैशाख २०८३, बुधबार / Apr 22, 2026
एजेन्सी, माघ ८ । रुसी राष्ट्रपति भ्लादिमीर पुटिनले अमेरिकी राष्ट्रपति डोनाल्ड ट्रम्पको ‘बोर्ड अफ पिस’ अभियानमा सहभागी हुने इच्छा व्यक्त गर्नुभएको छ । रुसी सञ्चारमाध्यम आरटीका अनुसार राष्ट्रपति पुटिनले प्यालेष्टाइनसँगको विशेष सम्बन्धलाई दृष्टिगत गर्दै यस अभियानका लागि एक अर्ब अमेरिकी डलर योगदान गर्ने घोषणा समेत गर्नुभएको हो ।
उक्त रकम अघिल्लो अमेरिकी प्रशासनले रोक्का गरेको रुसी सम्पत्तिबाट उपलब्ध गराउने प्रस्ताव पुटिनले गर्नुभएको छ । बाँकी कोष युद्ध प्रभावित क्षेत्रहरूको पुनर्निर्माणमा प्रयोग गर्न सकिने उहाँको भनाइ छ । यस विषयमा थप छलफलका लागि भोलि मस्कोमा प्यालेष्टिनी राष्ट्रपति महमुद अब्बास र अमेरिकी प्रतिनिधिहरूबीच वार्ता हुने कार्यक्रम तय भएको छ ।
यता, स्विट्जरल्याण्डको डाभोसमा जारी विश्व आर्थिक मञ्चको बैठकमा बोल्दै राष्ट्रपति ट्रम्पले पुटिनलाई उक्त अभियानमा सहभागी गराउन खोजिएको विषयको बचाउ गर्नुभएको छ । पत्रकारको प्रश्नको जवाफ दिँदै ट्रम्पले विश्वका शक्तिशाली र प्रभावकारी मुलुकहरूलाई समेट्ने उद्देश्यले पुटिनलाई निम्तो दिन लागिएको स्पष्ट पार्नुभयो ।
ट्रम्पले कतिपय पात्र विवादित भए पनि ठोस नतिजा निकाल्न उनीहरूको प्रभाव महत्वपूर्ण हुने तर्क गर्दै विश्व शान्तिका लागि व्यवहारिक पहल आवश्यक रहेको धारणा व्यक्त गर्नुभयो ।
