- २० आश्विन २०८३, मंगलवार / Oct 6, 2026
काठमाडौं । राप्रपा अध्यक्ष राजेन्द्र लिङ्देन अष्ट्रेलियाको र थाइल्याण्डको भ्रमण पूरा गरी फर्किएका छन् । प्रवासी एकता समाज अष्ट्रेलियाको निमन्त्रणामा विभिन्न शहरमा आयोजित विविध कार्यक्रममा सहभागी हुन साउन ३१ गते उनी त्यसतर्फ गएका थिए ।
अष्ट्रेलियामा रहँदा एनआरएनए अष्ट्रेलिया, झापाली समाज, अवैतनिक महावाणिज्यदूतको कार्यालय एवं मेलवर्न, एडिलेड र सिड्नीका नेपाली समुदायद्वारा आयोजित कार्यक्रममा सहभागी भएका थिए । लिङ्देनले बैङ्ककमा आयोजित प्रवासी नेपाली एकता समाज थाइल्याण्डको भेलालाई पनि सम्बोधन गरेका थिए ।
भ्रमण पूरा गरी स्वदेश फर्किएका अध्यक्ष लिङ्देनलाई त्रिभुवन विमानस्थलको विशिष्ट कक्षमा कार्यवाहक अध्यक्ष वरिष्ठ उपाध्यक्ष बुद्धिमान तामाङ, महामन्त्री एवं सचिवालय प्रमुख राजेन्द्र गुरुङ लगायतले स्वागत गरे ।
भ्रमण टोलीमा केही समयअघि अष्ट्रेलिया पुगेका प्रवक्ता एवं कोशी प्रदेशका सांसद भक्तिप्रसाद सिटौला, केन्द्रीय सदस्य एवं प्रवास विभाग प्रमुख आनन्द अधिकारी, केन्द्रीय सदस्य हिक्मत जङ्ग कार्की पनि सहभागी थिए।
