- ५ जेष्ठ २०८३, मंगलवार / May 19, 2026
काठमाडौं, ५ जेठ । सर्वोच्च अदालतमा रिट निवेदन दर्ता नै हुन नसकेको भन्दै नेपाल बार एशोसिएशनले विरोध जनाएको छ। बारले पाँच बुँदे विमति राख्दै आन्दोलनको घोषणा गरेको हो।
बारको हिजो बसेको बैठकले कायममुकायम प्रधानन्यायाधीशको आदेशपछि पनि रिट दर्ता नभएको भन्दै गम्भीर आपत्ति जनाएको छ। निवेदन बिना कारण रोकिँदा न्याय प्रक्रियामा अवरोध पुगेको बारको ठहर छ। बारले आज दिउँसो सवा १ बजे लालटिन बालेर विरोध प्रदर्शन गर्ने निर्णय समेत गरेको छ।
प्रधानन्यायाधीश सिफारिसविरुद्ध परेको रिट दरपिठ गर्ने आदेशविरुद्धको निवेदन दर्ता गर्न कामु प्रधानन्यायाधीश सपना प्रधान मल्लले आदेश दिए पनि सर्वोच्च अदालत प्रशासनले दर्ता नगरेको बताइएको छ।
संवैधानिक परिषद्ले सर्वोच्च अदालतका न्यायाधीश डा. मनोजकुमार शर्मालाई प्रधानन्यायाधीशमा सिफारिस गरेको थियो। उक्त सिफारिसविरुद्ध वरिष्ठ अधिवक्ता दिनेश त्रिपाठी र अधिवक्ता प्रेमराज सिलवालले रिट पेस गरेका थिए, तर प्रशासनले दर्ता अस्वीकार गरेको जनाइएको छ।
त्यसपछि उनीहरूले दरपिठविरुद्ध निवेदन दिएका थिए। तर उक्त निवेदन पनि होल्डमा राखिएपछि विवाद कामु प्रधानन्यायाधीशसमक्ष पुगेको हो। नेपाल बारले यस घटनालाई न्यायमा अवरोध भएको भन्दै तत्काल समाधान गर्न माग गरेको छ।
