चीनतर्फको सीमा नाका पाँच वर्षपछि खुले

गोरखा । गोरखा सामागाउँको रुइला नाका र छेकम्पारको ङुइला नाका छोटो समयका लागि खुला भएका छन् । गोरखासँग जोडिएको चीनतर्फको दुई वटा सीमा नाका खुलेका हुन ।

छेकम्पारतर्फको ङुइला नाका मंगलबारदेखि एक महिनाको लागि र सामागाउँतर्फको रुइला नाका १५ दिनका लागि खुला गरिएको हो ।
सशस्त्र प्रहरी बलले केही महिनाअघि मात्रै चुमनुब्री गाउँपालिका वडा नम्वर–१ को साम्दोमा बोर्डर आउट पोष्ट (बिओपी) स्थापना गरेको छ ।

नाका खुल्ने भए पछि बिओपीबाट सुरक्षाकर्मीलाई ३५ नम्वर पिल्लर रुइला नाकामा पठाउन लागिएको जनाएको छ । रुइला नाकाबाट पनि तिब्बती बजारको सीमित क्षेत्रमा मात्रै प्रवेश दिइने चिनियाँ पक्षले बताएको छ ।

ङुइला नाकाबाट सबैभन्दा नजिकको तिब्बती गाउँ स्याकसम्ममात्रै जान पाउने गरि नाका खुले छ । पाँच वर्ष पहिले नाका बन्द हुनुअघिसम्म चुम उपत्यकाका बासिन्दा किनमेलका लागि तिब्बती बजार झोंगासम्मै पुग्ने गरेका थिए ।