- २९ श्रावण २०८३, शुक्रबार / Aug 14, 2026
रुस, १४ साउन । रुसको पूर्वी क्षेत्रमा आज बिहान शक्तिशाली ८.८ म्याग्निच्युडको भूकम्प गएको छ । अमेरिकी भूगर्भीय सर्वेक्षण केन्द्र (यूएसजीएस) का अनुसार यो भूकम्प पेट्रोपाभ्लोभ्स्क–काम्चात्स्की शहरबाट करिब १३६ किलोमिटर टाढा र १८.२ किलोमिटर गहिराइमा गएको थियो । यसपछि परकम्पहरू भने निकै कम भएका छन् ।
रुसी समाचार संस्था तासले भूकम्पमा थुप्रै व्यक्ति घाइते भएको जनाउँदै ठूलो मानवीय क्षतिको जोखिम रहेको जनाएको छ । भूकम्पपछि रुस, जापान र अमेरिकाको अलास्का क्षेत्रमा सुनामीको जोखिमका कारण सतर्कता अपनाउन र नागरिकलाई सुरक्षित ठाउँमा बस्न आग्रह गरिएको छ ।
जापानको टोकियो इलेक्ट्रिक पावर कम्पनी (टीईपीसी) ले फुकुशिमा दाइची र दाइनी आणविक प्लान्टका कामदारलाई तत्काल सुरक्षित ठाउँमा सारेर सुरक्षा सुनिश्चित गरेको छ । अमेरिकी अधिकारीहरूले अलास्का र हवाईमा सुनामी आउने चेतावनी जारी गरेका छन् ।
सुनामीलाई शक्तिशाली छालहरूको श्रृङ्खला भएको बताइएको छ जसले व्यापक क्षति पुर्याउन सक्ने खतरा छ । यो भूकम्प रुसको क्षेत्रमा सन् १९५२ यताकै सबैभन्दा शक्तिशाली भूकम्प हो । विगत १० दिनमा त्यही क्षेत्रमा लगातार भूकम्पका घटना देखिएका छन् । जुलाई २० मा मात्र पाँच वटा भूकम्प भइसकेका थिए ।
