- २२ भाद्र २०८३, सोमबार / Sep 7, 2026
गुल्मी , ९ माघ । गुल्मीमा राष्ट्रिय स्वतन्त्र पार्टी ( रास्वपा ) बाट प्रतिनिधिसभा उम्मेदवार बनेका सागर ढकाल आफ्नो निर्वाचन क्षेत्रभन्दा बाहिर पनि घरदैलो अभियानमा सक्रिय देखिएका छन् ।
ढकालले गुल्मी निर्वाचन क्षेत्र नम्बर – १ बाट उम्मेदवारी दर्ता गराएका छन् । तर चुनावी प्रचारका क्रममा उनी क्षेत्र नम्बर – २ मा पुगेर घरदैलो गरिरहेका छन् । क्षेत्र नम्बर – २ मा रास्वपाबाट गोविन्द पन्थी उम्मेदवार रहेका छन् । ढकाल र पन्थी संयुक्त रूपमा घरदैलो अभियानमा सहभागी भएका हुन् । गुल्मी क्षेत्र नम्बर–१ मा ढकालको मुख्य प्रतिस्पर्धा नेकपा एमालेका प्रदीप ज्ञवाली , नेपाली कांग्रेसका डा. चन्द्र भण्डारी र नेपाल कम्युनिस्ट पार्टीका सुदर्शन बरालसँग हुने देखिएको छ ।
त्यसैगरी, क्षेत्र नम्बर–२ मा गोविन्द पन्थीले नेकपा एमालेका गोकर्ण विष्ट, नेपाली कांग्रेसका भुवनप्रसाद श्रेष्ठ र नेपाल कम्युनिस्ट पार्टीका श्रीराम महतसँग प्रतिस्पर्धा गर्नेछन् । नयाँ दलका नयाँ उम्मेदवारहरूले स्थापित तथा हेभीवेट नेताहरूसँग प्रतिस्पर्धा गर्न लागेको कारण गुल्मी जिल्लाको चुनावी माहोल थप चासोको विषय बनेको छ ।
यसैबीच, सागर ढकालले आफ्नो चुनावी प्रचार अभियानमा भएको खर्च सार्वजनिक गरेका छन् । उनले माघ ८ गते बेलुकी मालिका गाउँपालिकामा बसेका चार जनाको खर्च विवरण सार्वजनिक गरेका हुन् । ढकालका अनुसार एक रातमा जम्मा २ हजार ६ सय २५ रुपैयाँ खर्च भएको छ । उनले प्रचार अभियानका क्रममा मासु , मदिरा लगायतका अनावश्यक खर्च नगर्न कार्यकर्तालाई आग्रहसमेत गरेका छन् ।
