हुरीबतास, चट्याङ र असिनासहित वर्षाको सम्भावना

काठमाण्डौ, १३ चैत्र । देशका विभिन्न भागमा आज र भोलि हुरीबतास, चट्याङ र असिनासहित वर्षा हुने सम्भावना रहेको मौसम पूर्वानुमान महाशाखाले जनाएको छ।

महाशाखाका अनुसार हिजो बेलुकीदेखि नै देशका धेरै ठाउँमा बदली भई वर्षा सुरु भइसकेको छ। आज सबै प्रदेशका पहाडी तथा हिमाली भू–भागका केही स्थान र तराईका एक–दुई ठाउँमा मेघगर्जन, चट्याङ, हावाहुरी र असिनासहित मध्यम वर्षा तथा हिमपात हुने सम्भावना रहेको छ।

भोलि भने कोशी, मधेश र बागमती प्रदेशका केही स्थानमा, साथै बाँकी हिमाली र पहाडी भू–भागका थोरै ठाउँमा मेघगर्जन, चट्याङसहित मध्यम वर्षा र हिमपात हुने पूर्वानुमान गरिएको छ।

मौसम पूर्वानुमान महाशाखाले यस अवधिमा हुरीबतास, असिनापानी र चट्याङबाट हुन सक्ने जोखिमबाट जोगिन सतर्कता अपनाउन सबैलाई आग्रह गरेको छ।