- ३१ असार २०८३, बुधबार / Jul 15, 2026
काठमाडौं । आईसीसी टी–२० विश्वकप क्रिकेटको नवौँ संस्करणमा शुक्रबार क्यानडाले आयरल्यान्डको सामना गर्दैछ । खेल अमेरिकाको न्यु योर्कस्थित नासाउ काउन्टी अन्तर्राष्ट्रिय रङ्गशालामा राति २०ः१५ बजे सुरु हुनेछ ।
आयरल्यान्ड र क्यानडा प्रतियोगिताको समूह ‘ए’ मा छन् । उक्त समूहमा अमेरिका, भारत र पाकिस्तान पनि छन् । उक्त समूहमा खेल्न लागिएको यो चौथो खेल हो । समूहको पहिलो खेलमा आयोजक अमेरिकाले क्यानडालाई सात विकेटले हराएको थियो ।
दोस्रो खेलमा भारतले आयरल्यान्डलाई आठ विकेटले पराजित गरेको थियो । तेस्रो खेलमा अमेरिकाले पाकिस्तानलाई सुपर ओभरमा पराजित गरेको थियो । दुई खेल खेलेको अमेरिका चार अङ्कसहित तालिकाको पहिलो स्थानमा छ । टी–२० विश्वकपमा आयरल्यान्डको यो आठौँ सहभागिता हो । क्यानडाको भने टी–२० विश्वकपमा यो पहिलो सहभागिता हो ।
टी–२० विश्वकपमा आयरल्यान्डले हालसम्म २६ खेल खेलेको छ । आयरल्यान्डले त्यसमध्ये सात खेलमा जित र १६ खेलमा हारको नतिजा निकालेको छ । आयरल्यान्डको तीन खेल भने अनिर्णीत रूपमा सकिएको छ । क्यानडाले भने टी–२० विश्वकपमा एकमात्र खेल खेलेर हार भोगेको छ ।
