- ३० श्रावण २०८३, शनिबार / Aug 15, 2026
काठमाण्डौ । काठमाण्डौ महानगरपालिकाले खैनी सुर्तीको अनुगमन गर्ने भएको छ । खैनी र सुर्तीजन्य पदार्थ खान र यसको बिक्रीमा पूर्ण रोक लगाएको महानगरले कसैले सुर्ती तथा खैनी बिक्री गरे नगरेकोबारे अनुगमन गर्ने भएको हो ।
महानगरले पहिलो चरणमा ५० जना नगरप्रहरी र सादा पोसाकका प्रहरी परिचालन गरी विक्रि वितरण गरेको देखे नगर प्रहरीमार्फत त्यस्ता किसिमका सामग्री जफत गरी कारबाही गर्ने जनाएको छ । रोग लागिसकेपछि लाखौँ रुपैयाँ खर्च गर्नुको साटो रोगै लाग्न नदिनु उत्तम भएकाले महानगरले यस्तो नियम कडाइकासाथ लागू गर्ने महानगरपालिकाको स्वास्थ्य विभागले जनाएको छ ।
सबै पसलमा अनुगमन गर्ने र अनुगमनका क्रममा सुर्तीजन्य पदार्थ भेटिए दुई पटकसम्म जफत र तेस्रो पटक पनि भेटिएमा पसल नै बन्द गर्ने महानगरले चेतावनी दिएको छ ।
सार्वजनिक ठाउँमा चुरोट खाएको पाइए सय रुपैयाँसम्म जरिबाना गराउने र सुर्तीजन्य वस्तुको प्रयोगले व्यक्तिको स्वास्थ्यमा पारिरहेको नकारात्मक असर रोक्न ऐनको व्यवस्थालाई कडाइकासाथ कार्यान्वयन गर्न महानगरपालिका कुनै कसुर बाकी नराख्ने जनाएको छ ।
