- ३० चैत्र २०८२, सोमबार / Apr 13, 2026
काठमाडाैं, १७ फागुन । संयुक्त अरब इमिरेट्स (युएई) ले आफ्नो भूमिमा इरानबाट गरिएको पछिल्लो आक्रमणको कडा शब्दमा निन्दा गरेको छ । युएईले उक्त कदमलाई राष्ट्रिय सार्वभौमसत्तामाथिको ठाडो उल्लंघन तथा अन्तर्राष्ट्रिय कानुनविपरीत कार्य भएको जनाएको छ ।
सामाजिक सञ्जालमार्फत सार्वजनिक गरिएको आधिकारिक धारणा अनुसार युएईले इरानको प्रहारलाई खतरनाक र कायरतापूर्ण कदमको संज्ञा दिएको छ । यस्ता गतिविधिले सर्वसाधारण नागरिकको सुरक्षामा गम्भीर खतरा पैदा गर्ने तथा समग्र क्षेत्रीय स्थिरतालाई कमजोर बनाउने चेतावनी समेत दिइएको छ ।
युएईको रक्षा मन्त्रालयले दिएको जानकारी अनुसार इरानले प्रहार गरेका १३७ वटा ब्यालिस्टिक मिसाइल र २०९ वटा ड्रोनलाई रक्षा प्रणालीले बीचमै निष्क्रिय पारेको दाबी गरिएको छ । तर केही ड्रोन भने देशको स्थल तथा जलक्षेत्रमा खसेका थिए ।
मन्त्रालयका अनुसार खसेका ती १४ वटा ड्रोनका कारण सीमित भौतिक क्षति भएको छ । हालको सुरक्षा अवस्थालाई ध्यानमा राख्दै युएईले आफ्ना सबै सुरक्षा निकायलाई उच्च सतर्कतामा राखिएको जनाएको छ ।
