- १५ जेष्ठ २०८३, शुक्रबार / May 29, 2026
काठमाडाैं, १८ वैशाख । आज वैशाख शुक्ल पूर्णिमाका अवसरमा किरात राई समुदायले परम्परागत उभौली पर्व देशभरका भूमिस्थानमा पूजा आराधना गरी मनाइरहेका छन् ।
बाली लगाउनुअघि राम्रो उत्पादन होस् भन्ने कामना गर्दै प्रकृतिको पूजा गर्ने परम्परा यस पर्वसँग जोडिएको छ । गर्मी बढ्दै जाँदा बेँसीबाट लेकतर्फ उक्लिने चलनका कारण यसलाई उभौली पर्व भनिएको हो ।
किरात समुदायको विश्वासअनुसार वैशाख शुक्ल पूर्णिमादेखि चराचुरुङ्गी तथा जङ्गली जनावर पनि लेकतर्फ उक्लिन्छन् । साथै नदीका माछा पनि गर्मीबाट बच्न माथिल्लो क्षेत्रमा जाने मान्यता रहेको छ ।
मार्गशीर्ष शुक्ल पूर्णिमामा बाली भित्र्याएर बेँसी झरेका मानिसहरू आजदेखि पुनः लेकतर्फ उक्लिने परम्परा छ । ‘उँभो’ शब्दले उन्नति, समृद्धि र राम्रो उत्पादनको प्रतीक जनाउने मानिन्छ ।
यस अवसरमा चण्डी नाच तथा साकेला नाच नाच्ने परम्परा रहेको छ । त्यसैले यस दिनलाई चण्डी पूर्णिमा पनि भनिन्छ ।
ललितपुरको हात्तीवनस्थित साकेला स्थलमा किरात समुदायका सदस्यहरूले पूजा आराधना गर्ने तयारी गरेका छन् । खोटाङको ऐँसेलुखर्क गाउँपालिकामा भने परम्पराअनुसार यो पर्व जेठ २२ गतेपछि मनाइने गरिएको छ ।
किरात समुदायका केही समूहले भने माघ १ गते उभौली र साउन १ गते उधौली पर्व मनाउने चलन पनि रहेको छ । तर अधिकांशले वैशाख शुक्ल पूर्णिमालाई मुख्य उभौली पर्वका रूपमा मनाउँदै आएका छन् ।
