- १३ बैशाख २०८३, आईतवार / Apr 26, 2026
काठमाडौँ, १३ बैशाख । पश्चिमी तथा स्थानीय वायुको आंशिक प्रभावका कारण देशका विभिन्न स्थानमा मौसम बदली भएको छ। आज र भोलि सबै प्रदेशका पहाडी तथा हिमाली क्षेत्रका केही स्थानमा वर्षा हुने सम्भावना रहेको जल तथा मौसम पूर्वानुमान महाशाखाले जनाएको छ।
आज बिहान काठमाडौँ उपत्यकाका केही स्थानमा छिटपुट वर्षा भएको छ भने कोशी, गण्डकी र लुम्बिनी प्रदेशका केही स्थान तथा बागमती प्रदेशका एक–दुई स्थानमा वर्षा भइरहेको छ। लुम्बिनी प्रदेशको तराई क्षेत्रका एक–दुई स्थानमा आज मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ।
देशका अन्य पहाडी क्षेत्रमा पनि हल्कादेखि मध्यम वर्षाको सम्भावना रहेको छ। गएराति कोशी, गण्डकी, बागमती र लुम्बिनी प्रदेशका केही स्थानमा ठूलो वर्षा भएको थियो। तल्लो वायुमण्डलमा पूर्वी वायुको प्रभाव देखिएकाले केही स्थानमा वर्षा भएको महाशाखाको भनाइ छ।
तराई क्षेत्रमा भने अझै गर्मी कायमै रहेको छ। मधेश, बागमती र गण्डकी प्रदेशका तराईका केही स्थानमा वर्षाको गतिविधि बढ्न सक्ने देखिएकाले वर्षापछि तापक्रम केही घट्ने अनुमान गरिएको छ।
अहिले प्रि–मनसुनको समय भएकाले वर्षा, असिना, मेघगर्जन, चट्याङ र हावाहुरीको सम्भावना रहेकाले सतर्कता अपनाउन महाशाखाले सर्वसाधारणलाई अनुरोध गरेको छ।
