- १५ जेष्ठ २०८३, शुक्रबार / May 29, 2026
काभ्रे, १४ बैशाख । गत शनिबार साँझदेखि अवरुद्ध बीपी राजमार्ग अझै सञ्चालनमा आउन सकेको छैन। रोशी खोलामा आएको बाढीले क्षति पुर्याएको डाइभर्सन आइतबार अधिकांश स्थानमा निर्माण गरिए पनि आइतबार साँझ पुनः परेको वर्षाले ती डाइभर्सन फेरि बगाएपछि राजमार्ग पुनः अवरुद्ध भएको हो।
राजमार्गको चिउरीबास, नार्के र चारसय बेँसी क्षेत्रमा आइतबार निर्माण गरिएका डाइभर्सन साँझको वर्षाले बगाएको प्रहरीले जनाएको छ। इलाका प्रहरी कार्यालय मङ्गलटारका प्रमुख प्रहरी निरीक्षक ईश्वर कार्कीका अनुसार रोशी खोलाले बगाएका १३ स्थानका डाइभर्सनमध्ये ८ स्थानमा पुनः निर्माण गरिएको थियो। तर आइतबार साँझको वर्षाले केही स्थानका डाइभर्सन पुनः क्षतिग्रस्त भएका छन्।
उनका अनुसार सोमबार बिहानदेखि पुनः डाइभर्सन निर्माणको काम सुरु गरिएको छ। शनिबार आएको बाढीले चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, बोक्सीकुना, कालढुंगा, डालाबेशी, बुलढुंगा र माम्ती क्षेत्रमा रहेका डाइभर्सन बगाएको थियो। सिन्धुलीतर्फ आँपघारी र नेपालथोक क्षेत्रमा पनि डाइभर्सन बगाएको थियो।
प्रहरीका अनुसार सडक डिभिजन कार्यालय र ठेकेदार कम्पनीले मौसममा सुधार आएपछि क्षतिग्रस्त डाइभर्सन मर्मत गरी यातायात सञ्चालन पुनः सुचारु गर्ने तयारी गरेका छन्।
