- २२ आश्विन २०८३, बिहीबार / Oct 8, 2026
काठमाडौँ। हाल देशभर पश्चिमी वायुको सामान्य प्रभाव रहेको छ। मौसम पूर्वानुमान महाशाखाका अनुसार यसको प्रभावले देशका अधिकांश भूभागमा आंशिक बदली रहेको छ।
आज दिउँसो तराई क्षेत्रका केही स्थानहरूमा मध्यान्हसम्म हुस्सु तथा कुहिरो लाग्ने सम्भावना रहेको छ। कोशी, बागमती, गण्डकी र कर्णाली प्रदेशका उच्च पहाडी तथा हिमाली भूभागमा सामान्य बदली रहनेछ भने बाँकी पहाडी तथा हिमाली क्षेत्रमा आंशिक बदली रहनेछ। तराई भूभागमा भने मुख्यतया मौसम सफा रहने अनुमान गरिएको छ।
उल्लेखित चार प्रदेशका उच्च पहाडी तथा हिमाली क्षेत्रका एक–दुई स्थानमा हल्का वर्षासहित हिमपातको सम्भावना रहेको महाशाखाले जनाएको छ। आज राति तराईका थोरै स्थानहरूमा तुवाँलो लाग्न सक्ने सम्भावना छ।
कोशी, गण्डकी र कर्णाली प्रदेशका उच्च पहाडी तथा हिमाली भूभागमा आंशिक बदली रहनेछ भने बाँकी स्थानमा मौसम मुख्यतया सफा रहनेछ। साथै, उच्च पहाडी तथा हिमाली भूभागका एक–दुई स्थानमा हल्का वर्षा तथा हिमपातको सम्भावना कायमै रहने जनाइएको छ।
मौसममा हुन सक्ने परिवर्तनका कारण विशेषगरी उच्च पहाडी तथा हिमाली क्षेत्रमा यात्रा गर्नेहरूलाई आवश्यक सतर्कता अपनाउन मौसमविद्ले आग्रह गरेका छन्।
