- ५ आश्विन २०८३, सोमबार / Sep 21, 2026
काठमाण्डौ । कर्णाली चिसापानी जलविद्युत् आयोजनाको अध्ययन तीन वर्षभित्रमा सक्ने गरी नेपाल विद्युत् प्राधिकरणले प्रक्रिया अगाडि बढाएको छ । नेपालमा अहिलेसम्म पहिचान भएकामध्ये सबैभन्दा ठूलो जलविद्युत् आयोजना को काम अगाडि बढाउने, ऊर्जा सुरक्षा तथा बाढी नियन्त्रण र पानीको जोहो गर्ने लक्ष्यका साथ सरकारले ‘रणनीतिक महत्व’को आयोजना अगाडि बढाउन लागेको हो ।
१० हजार आठ सय मेगावाट क्षमताको कर्णाली चिसापानी जलविद्युत् आयोजनाको सम्भाव्यता अध्ययन ६ दशक अघि भएको हो । प्राधिकरणले तीन वर्षभित्र विस्तृत सम्भाव्यता तथा वातावरणीय अध्ययन सम्पन्न गरी सरकारलाई प्रतिवेदन बुझाउने छ । प्रतिवेदनमा निर्माणको ढाँचा, माथिल्लो तटीय भागमा रेहका आयोजनामा पर्ने असर र व्यवस्थापन सम्बन्धी सिफारिस समेत समावेश हुने छ ।
कर्णाली चिसापानी जलाशयुक्त आयोजनाको विस्तृत सम्भाव्यता तथा वातावरणीय अध्ययन र विस्तृत इञ्जिनियरिङ डिजाइन गराउन स्वीकृति पाएसँगै प्रक्रिया अघि बढाएको प्राधिकरणले जनाएको छ । ऊर्जा मन्त्रालयमा केही दिन पहिले भएको छलफलमा प्राधिकरणका कार्यकारी निर्देशक कुलमान घिसिङले आयोजनाको अध्ययन गर्ने जिम्मेवारी पाउनु पनि आफूहरुका लागि महत्वपूर्ण विषय भएको बताएका थिए ।
