- ३१ आश्विन २०८३, शनिबार / Oct 17, 2026
काठमाडौं । नेकपा एमालेका सचिव योगेश भट्टराईले गिरीबन्धु टि स्टेटको जग्गा सट्टापट्टाको विषयमा कांग्रेसले आफूतिर लागेका आरोप पन्छाउन अर्कोमाथि आरोप लगाउने काम गरेको बताएका छन् ।
मंगलबार प्रतिनिधि सभामा विशेष समयमा लिएर उनले यस्तो बताएका हुन् । पार्टीको संसदीय दलको छलफलमा आधारमा तय गरेका विषय राख्न खोजेको भन्दै सचिव भट्टराईले गिरीबन्धुबारे भएका काम कानुनअनुसार भएको र कानुन बनाउँदा कांग्रेसको तर्फबाट कुनै संशोधन प्रस्ताव नभएको बताए । कांग्रेसले आफूतिर लागेका आरोप पन्छाउन अर्कोमाथि आरोप लगाउने काम गरेको उनको आरोप छ ।
कांग्रेसले आफूमाथि लागेका आरोपहरु पन्छाउन गिरीबन्धुको विषय उठाइएको उनको टिप्पणी छ ।भ्रष्टाचार र अपराध गर्ने छुट कसैलाई नहुने र त्यस्तो छुट एमालेले पनि लिन नचाहने उनको भनाइ छ ।
‘कुनै पनि अपराधमा चारतारे झण्डा ओढोस्, हसिया हथौडाको झण्डा ओढोस्, घण्टी बजाओस्, हलो बोकोस् त्यो कसैलाई पनि छुट छैन् । त्यो छुट एमाले पनि लिन चाहँदैन् । हामी प्रत्येक विषयमा छानबिनका लागि तयार छौं ।’
