चीनबाट रासायनिक मल आयात

काठमाण्डौ । चीनबाट रासायनिक मल आयात हुन थालेको छ । चीनसंगको व्यापारिक नाका तातोपानीबाट २ सय ३२ मेट्रिक टन रासायनिक मल भित्रिएको हो । ६ महिनाअघि नै आउनुपर्ने मल बल्ल भित्रिन थालेको छ । पहिलो खेप ल्याएपछि चीनले रासायनिक मल निर्यातमा रोक लगाएपछि ल्याउन ढिलाइ भएको जनाइएको छ । चीनसँगको प्रमुख व्यापारिक भन्सार नाका तातोपानीबाट रासायनिक मल नेपाल आउन थालेको छ ।

तातोपानी नाका भएर बुधबार दुई सय ३२ मेट्रिक टन युरिया मल भित्रिएको तातोपानी भन्सार कार्यालयले जनाएको छ । ग्लोबल टेन्डरमा शिल्कले प्रतिमेट्रिक टन रासायनिक मल ६ सय ६१ अमेरिकी डलरमा आयात गर्ने सम्झौता गरेको थियो । यो सँगै रासायनिक मलमा चीन नेपालको नयाँ बजार बनेको छ ।