- १८ असार २०८३, बिहीबार / Jul 2, 2026
काठमाडौं । सातौँ संस्करणको टी–२० पुरुष विश्वकपको फाइनलमा न्युजिल्यान्डलाई आठ विकेटले पराजित गर्दै अस्ट्रेलिया पहिलोपटक विश्वकप क्रिकेट प्रतियोगिता विश्व च्याम्पियन बनेको छ ।
दुबईमा आइतबार सम्पन्न सातौँ संस्करणको फाइनलमा अस्ट्रेलियाले छिमेकी राष्ट्र न्युजिल्यान्डलाई हराउँदै टी–२० विश्वकपको उपाधि हात पारेको हो । आइसिसीले आयोजना गरेको क्रिकेट प्रतियोगितालाई अस्ट्रेलियाले सर्वाधिक आठपटक जितेको हो ।
पाँचपटक एकदिवसीय विश्वकप, दुईपटक च्याम्पियन्स ट्रफी तथा एकपटक टी–२० विश्वकप हात पारेको छ । पहिलो ब्याटिङ गरेको न्युजिल्यान्डले २० ओभरमा चार विकेट गुमाएर एक सय ७२ रनको योगफल खडा गरेको थियो ।
प्रत्युत्तरमा अस्ट्रेलियाले १८.५ ओभरमा केवल दुई विकेटको क्षतिमा एक सय ७३ रन जोड्दै टी–२० विश्वकपकै नयाँ विजेताको ट्रफी उचाल्यो । अस्ट्रेलियाको जितमा म्यान अफ दी म्याच मिचेल मार्सले सर्वाधिक ७७ रनको योगदान दिए ।
उनले ५० बलमा ६ चौका र चार छक्का प्रहार गरेका थिए ।
