ठगी गरेको आरोपमा एक महिला पक्राउ

जनकपुरधाम । लागूऔषध मुद्दाबाट छुटकारा गराइदिने भन्दै रकम ठगी गरेको आरोपमा महोत्तरीबाट प्रहरीले एकजना महिलालाई पक्राउ गरेको छ ।

जिल्ला प्रहरी कार्यालय, महोत्तरीका अनुसार पक्राउ पर्नेमा एकडारा गाउँपालिका ३ अजमरपट्टी घर भई सदरमुकाम जलेश्वर नगरपालिका २ बस्ने ३७ वर्षीया ममता मण्डल रहेकी छन् ।मण्डलले लागूऔषध मुद्दाका प्रतिवादी सम्सी गाउँपालिका ४ बस्ने युवकका परिवारसँग मुद्दा मिलाइ दिन्छु भनेर रु १ लाख ८० हजार ठगी गरेको पाइएको महोत्तरीका प्रहरी प्रबक्ता प्रकाश बिष्टले बताए ।

उनलाई जिल्ला प्रहरी कार्यालय महोत्तरीको टोलीले पक्राउ गरी ठगी मुद्दामा जिल्ला अदालतबाट १० दिनको म्याद थप गराई अन्य अनुसन्धान सुरु गरेको छ ।