तुसारो र चिसो बढ्दा जनजीवन कष्टकर

ओखलढुङ्गा । पछिल्ला दिनहरुमा ओखलढुङ्गा जिल्लाको माथिल्लो भेगमा तुसारोले जनजीवन कष्टकर बनाएको छ । केही दिन यता तुसारोसंगै चिसो बढ्दा जनजीवन थप कष्टकर बनेको हो ।

सिद्धिचरण नगरपालिका–६ जन्तरखानी ठाडेका हरिकुमार मगरका अनुसार जिल्लाको माथिल्लो भागमा बाक्लो तुसारो परेको छ । तुसारोका कारण चिसोले बढेकाले घाँस दाउरा तथा दैनिक काम गर्न समस्या भएको छ । स्कूले बालबालिका र जेष्ठ नागरिकलाई चिसोले अझ बढी समस्या भएको उनको भनाइ छ ।

जिल्लाको माथिल्लो क्षेत्रहरु जन्तरखानी, धाप, सिँगाने, झाप्रे, पात्ले, खिजिदेम्बाको माथिल्लो भेगमा तुसारोका कारण अत्याधिक चिसो बढेको छ । चिसोले धारा तथा ट्याङ्कीको पानी समेत जम्न थालेको स्थानीयको भनाइ छ । स्थानीयका अनुसार विगतका वर्षहरु भन्दा यस अत्यधिक चिसो बढेको छ ।