- १६ असार २०८३, मंगलवार / Jun 30, 2026
रसुवा । जिल्ला प्रशासन कार्यालय रसुवाले निषेधाज्ञा उल्लंघन गर्नेलाई कडा कारबाही गर्ने चेतावनी दिएको छ । मंगलबार थप १० दिन निषेधाज्ञा लम्ब्याईएसंगै निषेधाज्ञाको उल्लंघन गर्ने जो कोहीलाई कडा कारबाही गर्ने चेतावनी दिएको हो । जिल्ला स्तरीय कोभिड १९ संकट ब्यवस्थापन केन्द्रको बैठकले थप दश दिन निषेधाज्ञा जारी गर्ने निर्णय गरेको हो ।
बैसाख २६ देखि जेठ तीन गतेसम्म गरिएको निषेधाज्ञा अब जेठ १३ गते राती १२ बजे सम्म लागु हुने जिल्ला प्रशासन कार्यालय रसुवाले जनाएको छ । निषेधाज्ञाको समयमा खाद्य बस्तु तथा पशुपंछीका दाना, खाना पकाउने ग्यास, तरकारी, फलफुल, दुग्ध डेरीजन्य, माछा, मासु, पानी, निर्माण सामाग्री लगायतका अत्यावश्यक पसल व्यवसाय बिहान ६ बजेदेखि ९ बजेसम्म मात्र संचालन गर्न दिइएको छ ।
औषधी एवम स्वास्थ्य सामाग्रीका पसलहरु भने २४ सै घण्टा खुल्ला रहेका छन् । जिल्लामा कोरोना संक्रमण तिब्र रुपमा बढ्दै गइरहेकाले समुदायस्तरमा संक्रमणको दर न्युनिकरणका लागि दश दिन निषेधाज्ञा लम्ब्याइएको रसुवाका प्रमुख जिल्ला अधिकारी ईश्वरी प्रसाद ढकालले बताउनुभयो ।
