- ११ कार्तिक २०८३, बुधबार / Oct 28, 2026
३ भदौ काठमाडौं । प्रेम जालमा फसाएर एक बालिकालाई बलात्कार गरी बेचबिखन गर्ने राजु तामाङलाई प्रहरीले नियन्त्रणमा लिएको छ । १७ वर्षीया बालिकालाई विवाहको प्रलोभन देखाइ प्रेम जालमा फसाइ बलात्कार गरेर बेचबिखन गरेको मानव बेचबिखन अनुसन्धान ब्युरोले जनाएको छ ।
नुवाकोट जिल्ला तादी गाउँपालिका– ३ खरानिटार स्थायी घर भई हाल काठमाडौँको तारकेश्वर नगरपालिका– २ बस्ने अर्पण भनिने राजु तामाङलाई प्रहरीले पक्राउ गरेको हो । प्रलोभनमा पारेर बालिकालाई काठमाडौँको गोङ्गबुस्थित फेसबुक गेष्ट हाउसमा लगी पटकपटक बलात्कार गरेको अनुसन्धानबाट खुलेको ब्युरोका प्रहरी उपरीक्षक प्रभुप्रसाद ढकालले बताए ।
त्यसपछि साथीमार्फत ट्याक्सी चढाइ काँकडभिट्टाबाट सीमा कटाई भारतीय एक नचिनेको पुरुषलाई बालिका जिम्मा लगाएर फर्किएको खुलेको छ । भारतीयले अश्लिल भिडियो देखाउदै र रकम तिरेर किनेको भन्दै चरम यातना दिएको खुलेको र शारीरिक र मानसिक यातना दिएको पीडित बालिकाले बताएकी छिन् । बालिका पीडकको आँखा छलेर भाग्न सफल भई कैलालीस्थित प्रहरीको सम्पर्कमा पुगेको बताएकी छिन् ।
एक वर्षअघिको सो घटनाको अभियुक्त तामाङविरुद्ध साउन २९ मा कारवाही गरी पाउँ भनी जाहेरी परेकोपछि अर्पण भनिने राजु तामाङलाई ब्युरोको टोलीले भदौ १ गते पक्राउ गरेको हो । काठमाडौं जिल्ला अदालतले सात दिनको म्याद थप गरी अनुसन्धान गरिरहेको ब्युरोले जनाएको छ ।
