भजनी र जोशीपुरका १०० घर परिवार प्रभावित

१४ साउन २०७७ काठमाडौं । कैलालीको भजनी नगरपालिका र जोशीपुर गाउँपालिकाका वस्तीमा बाढीले एक सय घर परिवार प्रभावित भएका छन् ।

भजनी नगरपालिका वडा नम्बर २ को मोहनपुर, वडा नं. ३ को ढुसी गाउँ, वडा नम्बर ५ को फुलियापुर गाउँमा बाढी पसेको हो । ढुसी गाउँको चेकड्याम भत्काएर बाढी वस्तीमा पसेको भजनी नगरपालिकाका मेयर शेरबहादुर चौधरीले बताए ।

मोहनपुर, ढुसी र काँडा गाउँमा ५०–६० घरमा पानी पसेको जानकारी आएको प्रहरीले जानकारी दिएको छ । डुबानमा परेका घर परिवारलाई सुरक्षित स्थानमा सार्ने क्रम जारी रहेको जिल्ला प्रहरी कार्यालयका डीएसपी प्रतीक विष्टले बताए । कैलालीकै जोशीपुर गाउँपालिकाको वडा नम्बर १, ३, ४, ५, ६ र ७ का वस्ती पनि डुबानमा परेका छन् ।