- २२ आश्विन २०८३, बिहीबार / Oct 8, 2026
२६ असार २०७७ काठमाडाैं । वर्षासँगै बाढी आउने सम्भावना बढेकाले राष्ट्रिय विपद् जोखिम न्यूनीकरण तथा व्यवस्थापन प्राधिकरणले सबैलाई सचेत रहन आग्रह गरेको छ । प्रदेश १, प्रदेश २, बाग्मती प्रदेश र गण्डकी प्रदेशमा यो वर्षकै सबैभन्दा बढी पानी पर्ने भन्दै प्राधिकरणले बाढीबाट बच्न सचेत गराएको हाे ।
यस वर्ष प्रशस्त पानी परिरहेकाले बाढी, डुबान र पहिरोको जोखिम बढेको प्राधिकरणकाे ठाेकुवा छ । अविरल वर्षाले पहाडी भेगको भू–भाग भित्रसम्म गलेकाले कतिपय ठाउँमा पहिरो जानेबारे चनाखो रहन प्राधिकरणले आग्रह गरेको छ । तराईका झापा, मोरङ, सुनसरी, सप्तरी, धनुषा, महोत्तरी, सिरहा, सर्लाही, बारा, पर्सा, रौतहट, चितवनलगायत जिल्लाका कतिपय होचो ठाउँमा डुबानको सम्भावना रहेकाे बताएकाे छ ।
त्यस्तै लुम्बिनी, कर्णाली र सुदूरपश्चिम प्रदेशमा पनि बाढी र पहिराेकाे उच्च जाेखिम बढेकाले सतर्क रहन प्राधिकरणले अनुराेध गरेकाे छ । कन्काई, कोसी, कमला, बाग्मती, नारायणी तथा सहायक नदीमा पानीको बहाव बढेर बाढीकाे खतरा पूर्वानुमान गरिएको छ । खहरे खोला तथा नदीहरूमा ठूलो बाढी आउन सक्ने भन्दै सबै क्षेत्रका बासिन्दालाई सतर्क रहन विशेष आग्रह गरेको हाे ।
