- ११ कार्तिक २०८३, बुधबार / Oct 28, 2026
१ भदौ २०७७ काठमाडौं ।, स्वतन्त्र ऊर्जा उत्पादकहरुको संस्था (इपान) को अध्यक्षमा वरिष्ठ उद्यमी कृष्णप्रसाद आचार्य सर्वसम्मत चयन भएका छन् । आचार्यलाई आइतबार साँझ अबेर सम्पन्न इपानको भेलाले सर्वसम्मत निर्वाचित गरेको हो । बाम र प्रजातान्त्रिक प्यानलबीच निर्वाचनमार्फत नेतृत्व चयन गर्ने रस्साकस्सीका बीच इपानमा आचार्यको नाम सर्वसम्म चयन भएको छ ।
यस अघि ९ सदस्यीय रहेको इपानको कार्यसमिति विधान संशोधन गरी १६ सदस्यीय बनाइएको छ । समितिका तीन उपाध्यक्षमा क्रमशः आशिष गर्ग, गणेश कार्की र मोहन डाँगी चयन भएका छन् । बिन्दवासिनी हाइड्रो पावर कम्पनी लिमिटेडका संस्थापक अध्यक्ष आचार्य निर्माणाधीन १ सय ५५ मेगावाटको धुन्साखोला तेह्रथुम, ४८.८ मेगावाटको खिम्ति–२ दोलखा, २० मेगावाटको लाङटाङखोला रसुवा र व्यवसायिक उत्पादनमा रहेको मोदी खोला–१ पर्वत हाइड्रो पावरसँग सम्वद्ध छन् ।
आचार्य २०६३-०६३ को जनआन्दोलनपछि गठित अन्तरिम संसदमा उद्योगी–व्यवसायीका तर्फबाट सांसदसमेत थिए ।
महासचिवमा गोरे शेर्पा, सचिवमा भरत खत्री, बलराम खतिवडा र राम आचार्य तथा कोषाध्यक्षमा आनन्द चौधरी चुनिएका छन् ।
कार्यसमिति सदस्यहरुमा प्रकाश दुलाल, भरत खड्का, भरत लामिछाने र उत्तम ब्लोन तथा महिला सदस्यमा अविज्ञा मल्ल र कविता कँडेल सर्वसम्मत चयन भएको इपानले जनाएको छ । इपानले पहिलोपटक संघीय संरचनाअनुसार सांगठनिक पुनर्संरचना गर्ने तयारी थालेको छ ।
