- २ भाद्र २०८३, मंगलवार / Aug 18, 2026
काठमाडौं । गण्डकी प्रदेशका विभिन्न पर्यटकीय क्षेत्रहरुमा नेपाल टेलिकमले थ्रीजी र फोरजी सेवा विस्तार गरेको छ । बागलुङ, म्याग्दी, मुस्ताङ र पर्वतका धार्मिक, पर्यटकीय क्षेत्र तथा पहाडी पदमार्गमा नेपाल टेलिकमले सेवा विस्तार गरेसंगै स्वदेशी तथा विदेशी पर्यटकले सुरक्षित महसुस गरेका छन् ।
विभिन्न ठाउँहरुमा कुनै कारणबस दुर्घटनापछिको खोजी तथा उद्धार, प्रसूति सेवा र पर्यटकको सुरक्षामा राहत महसुस गरेको यहाँका मानिसहरु जनाएका छन् । पछिल्लो पटक लुलाङमा राखिएको फोरजी टावरले धौलागिरि बेसक्याम्प जाने पर्यटकका लागि निकै राहत महसुुस गराएको एक पर्यटकले बताए । उनका उनुसार यहाँबाट गुर्जाघाट र ढोरपाटनको उत्तरी भेगमा टेलिफोन, मोबाइल र इन्टरनेट चल्न थालेको छ ।
त्यस्तै नेपाल टेलिकम बाग्लुुङले मुक्तिनाथ, लोमान्थाङ, थ्रोङला भन्ज्याङ, रुकुम सिमानाको पाथीहाल्ने, निसेलढोर लगायतका क्षेत्रमा समेत इन्टरनेट सेवा विस्तार गरेको छ । मुस्ताङको लोमान्थाङ, कोरला नाका र चराङलगायत उच्च बस्तीमा पनि अहिले सहजरुपमा फोरजी सेवा सूचारु भएको छ ।
टेलिकमले आन्तरिक तथा बाह्य पर्यटकको सूरक्षालाई मध्यनजर गर्दै र नेपालीहरुलाई सञ्चार क्षेत्रमा सहज उपलब्धता गराउन बागलुङमा ६२ वटा टावरमा टूजी, थ्रीजी ५७ वटा र फोरजी ५४ वटा टावरमा जडान गरेको छ ।
त्यस्तै म्याग्दीमा २२ वटा टूजी, २१ थ्रीजी र १४ वटा फोरजी रहेका छन् भने मुस्ताङमा ३१ टूजी, २६ वटा थ्रीजी र २४ वटा फोरजी टावर सञ्चालन छन् ।
इता पर्वतमा २८ वटा टूजी, २१ वटा थ्रीजी र २६ वटा फोरजी टावर रहेको नेपाल टेलिकमले जनाएको छ ।
