- ११ कार्तिक २०८३, बुधबार / Oct 28, 2026
२ भदौ २०७७ भरतपुर । राप्ती नगरपालिका स्थित भण्डारामा रहेको सशस्त्र प्रहरी बल नं ३ गढीमाई बाहिनीका ४२ प्रहरीमा कोरोना सङ्क्रमण पुष्टी भएको छ । दुई महिला र ४० पुरुषमा संक्रमण देखिएको भरतपुर कोभिड–१९ प्रयोगशालाले जनाएको छ ।
बाहिनीका आठ जनामा कोरोना सङ्क्रमण देखिएपछि अन्यको परीक्षण गर्दा यति धेरै पोजिटिभ देखिएको बाहिनी प्रमुख सशस्त्र प्रहरी नायब महानिरीक्षक मन्दिप श्रेष्ठले बताए । साठ्ठी जनाको नमूना सङ्कलन गरी पठाइएकामा ४२ जनामा सङ्क्रमण देखिएको उनको भनाई छ ।
३०० भन्दा बढी सशस्त्र प्रहरी रहेका बाहिनीमा नौ जनालाई ज्वरो आएको र ठिक पनि भएको तर एक जनालाई मात्र ज्वरो बाँकी रहेको थियो । पूर्वी चितवनका नगरप्रमुखहरुको बैठकले सो बाहिनी उच्च जोखिममा रहेको भन्दै त्यहीँ आइसोलेसन निर्माण गर्न वाग्मती प्रदेशलाई अनुरोध गरेको छ ।
राप्ती नगरप्रमुख प्रभा बरालले सङ्क्रमण देखिएपछि सशस्त्र प्रहरी सबै बाहिनीभित्रै रहेकाले बाहिर सङ्क्रमण फैलन नपाएको अनुमान गरिएको बताउनुभयो । सङ्क्रमण देखिएका प्रहरीलाई त्यहीँभित्र आइसोलेसन तयार गरी उपचार गरिने उहाँले जानकारी दिनुभयो । सोमबार राति अबेर कोभिड–१९ प्रयोगशालामा आएको नतिजाअनुसार ५० सङ्क्रमितमध्ये ४६ चितवनका हुन् ।
