- २२ भाद्र २०८३, सोमबार / Sep 7, 2026
धनगढी२, ० पुस । सशस्त्र प्रहरी बल नेपालले आफ्नो २५औँ स्थापना दिवस तथा रजत महोत्सवको अवसर पारेर कञ्चनपुरको गड्डाचौकीबाट पूर्व–पश्चिम झण्डा मार्च सुरु गरेको छ ।
नेपालको पश्चिमी सीमा नाकासमेत रहेको गड्डाचौकीबाट आइतबार सशस्त्र प्रहरी बल नेपाल नम्बर ७ वैद्यनाथ बाहिनी मुख्यालय अत्तरियाका बाहिनीपति नायब महानिरीक्षक प्रदीपकुमार पालले झण्डा मार्चको औपचारिक शुभारम्भ गरे । उनले राष्ट्रिय झण्डा र संगठनको झण्डासहित मार्चमा सहभागी सशस्त्र प्रहरी टोलीलाई बिदाइ गरेका थिए । बाहिनीपति पालले सशस्त्र प्रहरी बल स्थापना भएको २५ वर्षको ऐतिहासिक यात्रालाई स्मरणीय बनाउने र राष्ट्रव्यापी सन्देश प्रवाह गर्ने उद्देश्यले झण्डा मार्च आयोजना गरिएको बताए । झण्डा मार्चले सशस्त्र प्रहरीको इतिहास, योगदान र सीमा सुरक्षामा रहेको भूमिकालाई उजागर गर्ने विश्वास पनि उनले व्यक्त गरे ।
झण्डा मार्चमा ३५ जनाको टोली पैदल यात्रामा सहभागी रहेको छ । गड्डाचौकीबाट सुरु भएको झण्डा मार्च सीमा क्षेत्र हुँदै १९औँ दिनमा नवलपुर पुग्ने कार्यक्रम रहेको छ । त्यस्तै, पूर्वी नाका झापाबाट पनि आजैदेखि झण्डा मार्च सुरु गरिएको छ । पश्चिम र पूर्वबाट सुरु भएका दुवै झण्डा मार्चका टोलीहरू १९औँ दिनमा नवलपुरमा भेटिनेछन् । नवलपुरमै विशेष समारोह आयोजना गरी सशस्त्र प्रहरीले रजत महोत्सव मनाउने जनाएको छ ।
