- ८ बैशाख २०८३, मंगलवार / Apr 21, 2026
काठमाडौं, २० पुस । डोल्पाको त्रिपुरासुन्दरी नगरपालिका–५ स्थित करोपगार्ड इलाका प्रहरी कार्यालयमा भएको तोडफोड र आक्रमणपछि सम्पर्कविहीन भएका भनिएका प्रहरीहरू सम्पर्कमा आएका छन् ।
प्रमुख जिल्ला अधिकारी भीमराज कोइरालाका अनुसार तोडफोड र आक्रमणबाट हातहतियार सुरक्षित राख्ने उद्देश्यले केही प्रहरी सुरक्षित स्थानमा गएका थिए । अवस्था सामान्य भएपछि ती प्रहरीहरू शनिबार राति नै सम्पर्कमा आएका हुन् । गत शुक्रबार ल्हाँ गाउँका ३४ वर्षीय जुन रोकाया प्रहरी चेकिङका क्रममा ठूलीभेरी नदीमा बेपत्ता भएपछि स्थानीय आक्रोशित बनेका थिए । सोही घटनालाई लिएर शनिबार साँझ स्थानीयवासीले करोपगार्ड इलाका प्रहरी कार्यालयमा आक्रमण गरेका थिए । आक्रमणबाट प्रहरी चौकीमा क्षति पुगेको छ भने केही प्रहरी घाइते भएका छन् ।
प्रहरीका अनुसार लागुऔषध ओसारपसारको आशंकामा छेप्के पुलमा जाँच गर्न खोज्दा रोकाया आफैं नदीमा हामफालेका हुन् । तर स्थानीयवासीले भने प्रहरीले लखेटी–लखेटी नदीमा खसालेको आरोप लगाएका छन् । नदीमा बेपत्ता भएका रोकायाको अवस्था अझै थाहा हुन सकेको छैन । उनको खोजी कार्य जारी रहेको प्रशासनले जनाएको छ ।
घटनाको छानबिनका लागि कर्णाली प्रदेश प्रहरी कार्यालयका एसपी रामप्रसाद घर्तीमगरको नेतृत्वमा तीन सदस्यीय छानबिन समिति गठन गरिएको प्रमुख जिल्ला अधिकारी कोइरालाले जानकारी दिए । घटनापछि करोपगार्ड इलाका प्रहरी कार्यालयका सबै १० जना प्रहरीलाई जिल्ला सदरमुकाम तानिएको छ । युवक बेपत्ता घटनामा प्रत्यक्ष संलग्न रहेका चार जना प्रहरीमाथि समेत अनुसन्धान भइरहेको जनाइएको छ ।
स्थानीय जनप्रतिनिधिसँग समन्वय गरी वार्ताको प्रयास भइरहेको र निष्पक्ष छानबिन गरेर पीडितलाई न्याय दिन प्रशासन प्रतिबद्ध रहेको प्रमुख जिल्ला अधिकारी कोइरालाले बताए । घटनाको विरोधमा ल्हाँ गाउँका बासिन्दाले डोल्पामा अनिश्चितकालीन यातायात बन्द घोषणा गरेका छन् ।
