नेपाल आज क्यानडासँग भिड्दै

काठमाडौं । क्यानडासँगको एक दिवसीय सिरिजमा आज नेपालले दोस्रो खेल खेल्दैछ । त्रिवि क्रिकेट मैदानमा हुने पहिलो खेलमा उत्कृष्ट पुनरागमनका साथ ७ रनले विजयी भएको नेपाल लगातार दोस्रो जितका साथ सिरिज एक खेल अगावै जित्न चाहन्छ ।

रोहित पोडेलको कप्तानीमा खेल हुने छ । पहिलो खेलमा ४ विकेट लिएर नेपाल अघि बढेको थियो । नेपालले टोलीमा तीन परिवर्तन गर्ने सम्भावना देखिएको छ । ओपनर आसिफ शेख, भीम सार्की र ललितनारायण राजवंशीलाई आज विश्राम दिनसक्छ ।

विकेटकिपर अनिल कुमार शाह, देव खनाल र आकाश चन्दलाई मौका दिनसक्ने सम्भावना छ । कुशल भुर्तेल, रोहित र आरिफ शेख नेपालका प्रमुख ब्याटर हुन् । सोमपाल कामी प्रमुख बलर हुन् ।

नेपालविरुद्ध पहिलो खेलमा अर्धशतक प्रहार गरेका निकोलस किर्तोन र परगत सिंहको प्रदर्शन क्यानडाको लागि महत्वपूर्ण हुनेछ । बलिङमा राम्रो प्रदर्शन गर्न आवश्यक देखिन्छ ।