प्रधानमन्त्री देउवालाई अमेरिका भ्रमण नगर्न संसदीय समितिको सुझाव

काठमाडौं । पाँच दलीय गठबन्धनभित्र प्रधानमन्त्री शेरबहादुर देउवाको अमेरिका भ्रमणका बेला कुनै सम्झौता नगर्ने सहमति भएको छ । आइतबार प्रधानमन्त्री शेरबहादुर देउवाको सरकारी निवास बालुवाटारमा बसेको सत्ता गठबन्धन दलका नेताहरुको बैठकमा प्रधानमन्त्री देउवाको हुन लागेको अमेरिका भ्रमणको बेला कार्यक्रममा सहभागी हुने तर कुनै सम्झौता, समझदारी नगर्ने सहमति भएको बताइएको हो ।

त्यस्तै नेपालको संसदले एमसीसी परियोजना पास गरेसंगै अमेरिकी सैन्य रणनीति स्टेट पार्टनरसीप प्रोग्राम (एसपीपी) सम्झौता मस्यौदामा हस्ताक्षर गर्न नेपाली सेना र नेपाल सरकारलाई अमेरिकी सेनाले ताकेता गरेपछि संसदीय समितिले प्रधानमन्त्रीलाई अमेरिका भ्रमण नगर्न सुझाव दिएको छ ।

संसदीय समितिले प्रधानमन्त्री देउवालाई भ्रमण नगर्न सुुझाव दिएपनि गठबन्धन सम्बद्ध दलहरुको बैठकबाट भ्रमणमा जाने अनुमोदन गराएका छन् । भ्रमणबारे जानकारी लिन प्रतिनिधि सभा अन्तरगत अन्तराष्ट्रिय सम्बन्ध समितिले भ्रमणबारे जानकारी लिन बोलाएकोमा प्रधानमन्त्री देउवा उक्त कार्यक्रममा समेत सहभागी भएनन् ।